واشنگٹن (مشرق نیوز) اسرائیلی وزیراعظم بنیامین نیتن یاہو کے دورہ امریکہ کے دوران واشنگٹن ڈی سی میں سینکڑوں افراد نے احتجاجی مظاہرہ کرتے ہوئے امریکی حکومت سے مطالبہ کیا کہ وہ بین الاقوامی فوجداری عدالت کے جاری کردہ وارنٹ گرفتاری پر عملدرآمد کرے۔
عالمی میڈیا رپورٹس کے مطابق شدید بارش کے باوجود مظاہرین فلسطینی پرچم اور بینرز اٹھائے وائٹ ہاو¿س کی جانب مارچ کرتے رہے، احتجاج کے دوران سکیورٹی کے غیر معمولی انتظامات کئے گئے تھے اور پولیس کی بھاری نفری تعینات رہی۔
رپورٹس کے مطابق مظاہرین کا ایک گروپ جارج ٹاون میں واقع فور سیزنز ہوٹل کی لابی میں بھی داخل ہوگیا، جہاں بنیامین نیتن یاہو رات کے کھانے میں شریک تھے، مظاہرین نے ہوٹل کے اندر موجود ریستوران تک پہنچنے کی کوشش کی تاہم سکیورٹی اہلکاروں نے انہیں روک کر عمارت سے باہر نکال دیا۔
احتجاج کے دوران مظاہرین ’بی بی، بی بی، تم چھپ نہیں سکتے، تم نسل کشی کر رہے ہو‘ جیسے نعرے بھی لگاتے رہے، جن کی ویڈیوز سوشل میڈیا پر تیزی سے پھیل رہی ہیں۔
واشنگٹن میں نیتن یاہو کیخلاف احتجاج، اسرائیلی وزیراعظم کی گرفتاری کا مطالبہ
