دشمن کی جارحیت کا بھرپور جواب دینے کی مکمل صلاحیت رکھتے ہیں: فیلڈ مارشل عاصم منیر

راولپنڈی (مشرق نیوز) فیلڈ مارشل سید عاصم منیر نے بھارتی اشتعال انگیزی اور کشمیر کے معاملے پر اپنا دوٹوک موقف بالکل واضح کرتے ہوئے ملکی دفاع کو ناقابل تسخیر قرار دیا ہے۔ انہوں نے 16 اپریل 2025 کو اوورسیز پاکستانیوں کی ایک پروقار تقریب سے خطاب کرتے ہوئے دشمن کے ناپاک عزائم کو ناکام بنانے کے عزم کا اعادہ کیا۔

پاکستانی سپہ سالار نے اپنے خطاب میں اس عزم کا اعادہ کیا کہ پاکستان دشمن کی کسی بھی بلا اشتعال جارحیت کا فوری اور فیصلہ کن جواب دینے کی مکمل صلاحیت رکھتا ہے۔ انہوں نے واضح طور پر کہا کہ بھارتی فوج تمام تر وسائل کے باوجود پاکستان کو شکست نہیں دے سکتی۔

فیلڈ مارشل سید عاصم منیر نے کشمیر کے حوالے سے پاکستان کے موقف کو دہراتے ہوئے کہا کہ کشمیر ہماری شہ رگ تھا اور ہمیشہ رہیگا۔ مقبوضہ کشمیر کے عوام غاصب بھارتی فوج کے خلاف جدوجہد کر رہے ہیں اور وہ اس جدوجہد میں تنہا نہیں ہیں۔انہوں نے کشمیریوں کیلئے پاکستان کی غیر متزلزل حمایت کا یقین بھی دلایا۔

انہوں نے مزید کہا کہ پاک فوج اور سکیورٹی ادارے بھارتی پراکسی دہشت گردوں کے ناسور کے مکمل خاتمے تک چین سے نہیں بیٹھیں گے۔ ماہرین کے مطابق فیلڈ مارشل سید عاصم منیر کے یہ تاریخی الفاظ ایک مکمل دفاعی ڈاکٹرائن کی حیثیت رکھتے ہیں جو دشمن کو پسپائی اور قوم کو تحفظ کا احساس دلاتے ہیں۔ سپہ سالار نے بھارتی فوج کی عددی برتری کو بے اثر قرار دیتے ہوئے واضح کیا کہ پاکستان کا دفاع مکمل طور پر ناقابل تسخیر ہے۔