پی ٹی اے ٹربیونل ممبر فنانس تعیناتی کیس، وزیراعظم 18 مئی کو طلب

اسلام آباد (مشرق نیوز) اسلام آباد ہائیکورٹ کے جسٹس محسن اختر کیانی نے کہا ہے کہ 18 مئی تک پی ٹی اے ٹربیونل میں ممبر فنانس تعینات کیا جائے ورنہ وزیراعظم آکر عدم تعیناتی کی وجہ بتائیں۔ اسلام آباد ہائیکورٹ میں پی ٹی اے ٹریبونل کے ممبر فنانس کی عدم تعیناتی سے متعلق کیس کی سماعت ہوئی۔

سماعت کے دوران جسٹس محسن اختر کیانی نے سخت ریمارکس دیتے ہوئے کہا کہ اگر 18 مئی تک ممبر فنانس کو تعینات نہ کیا گیا تو وزیراعظم کو عدالت میں پیش ہونا ہوگا، انہوں نے کہا کہ وزیراعظم خود آ کر بتائیں کہ ٹریبونل کے ممبر فنانس کی تعیناتی کیوں نہیں کی گئی۔ عدالت نے سیکرٹری کابینہ اور سیکرٹری بھی آئندہ سماعت پر طلب کرلئے، اسسٹنٹ اٹارنی جنرل نے عدالت کو بتایا کہ ایک ریٹائرڈ جج کو ٹریبونل کا ممبر تعینات کیا گیا ہے۔

جسٹس محسن اختر کیانی نے ریمارکس دیتے ہوئے کہا کہ ریٹائرڈ ججوں نے زیادہ بیڑا غرق کیا ہوا ہے اور انہیں ٹریبونلز میں جانے کا زیادہ شوق ہوتا ہے، انہوں نے مزید کہا کہ رات کو انہیں سیلوٹ یاد آتے ہیں تو وہ سونے نہیں دیتے۔ عدالت نے یہ بھی کہا کہ کوئی این آئی آر سی میں چلا جاتا ہے اور کوئی کسی اور ٹریبونل میں، مگر اداروں میں تعیناتی کا عمل شفاف اور بروقت ہونا چاہئے۔ کیس کی مزید سماعت 18 مئی تک ملتوی کر دی گئی ہے۔