پاکستانی طلبہ کے مسائل حل کرینگے،برطانوی ہائی کمشنر کی وزیر قانون کو یقین دہانی

اسلام آباد:(بیورورپورٹ)برطانوی ہائی کمشنر نے پاکستانی طلبہ کو ویزوں میں تاخیر درپیش مسائل حل کرنے کی یقین دہانی کرادی۔

وزیر قانون اعظم نذیر تارڑ سے برطانوی ہائی کمشنر جین میریٹ نے ملاقات کی،وفاقی وزیر نے پاکستانی طلبہ کے ویزوں کا معاملہ اٹھاتے ہوئے حکومتی تشویش سے آگاہ کیا،ملاقات میںدوطرفہ تعلقات اور باہمی دلچسپی کے امور پر بھی تبادلہ خیال کیا گیا۔

اعظم نذیر تارڑ نے کہاپاکستانی طلبہ کی بیرون ملک تعلیم کےلئے قانونی و ادارہ جاتی فریم ورک بہتر بنانے پر کام جاری ہے، سینکڑوں پاکستانی طلبہ ویزوں میں تاخیر کے باعث پریشانی کا شکار ،تعلیمی سال ضائع ہونے کا خدشہ ہے،تعلیمی مواقع میں رکاوٹیں دور کرنا ہوگی،برطانوی ہائی کمشنر نے طلبہ کے ویزوں میں تاخیر کا معاملہ حل کرنے کی یقین دہانی کرادی ۔