ویمنز ایشیا کپ، پاکستان اور بھارت کی ٹیمیں آج مدمقابل آئیں گی

دبئی (مشرق نیوز) ویمنز ٹی ٹی ٹوئنٹی ایشیا کپ میں بھارت اور پاکستان ہفتے کی شام دبئی میں اہم مقابلے کیلئے آمنے سامنے ہوں گے۔بھارت اپنے ابتدائی دونوں میچز جیت کر پہلے ہی سیمی فائنل میں جگہ بنا چکا ہے جبکہ پاکستان نے اب تک صرف ایک میچ کھیلا ہے۔

پاکستان کیلئے بھارت کے خلاف نتیجہ کچھ بھی ہو، ہانگ کانگ کے خلاف آخری گروپ میچ کے باعث اس کے ناک آوٹ مرحلے میں پہنچنے کے امکانات روشن ہیں۔ دونوں ٹیموں کیلئے اس میچ میں بیٹنگ خاص توجہ کا مرکز ہوگی۔ بھارت نے اپنے ابتدائی دونوں میچز میں بڑے سکور بنائے تاہم مڈل آرڈر کی کارکردگی تشویش کا باعث رہی۔

تھائی لینڈ کے خلاف اوپنرز کی مضبوط بنیاد کے باوجود بھارت نے 46 رنز کے عوض 8 وکٹیں گنوائیں۔ سمرتی مندھانا 143 رنز کے ساتھ بھارت کی سب سے کامیاب بیٹر ہیں جبکہ شفالی ورما نے 92 رنز بنائے ہیں۔

پاکستان کو بھی تھائی لینڈ کے خلاف بیٹنگ میں مشکلات پیش آئیں تاہم شوال ذوالفقار اور منیبہ علی نے حالیہ دور سری لنکا میں جارحانہ بیٹنگ کی جھلک دکھائی تھی۔ اگر پاکستان اپنی بہترین صلاحیت کے مطابق کھیلنے میں کامیاب رہا تو وہ ایشیا کپ میں بھارت کیخلاف اپنی دوسری ٹی 20 فتح حاصل کرسکتا ہے۔