لاہور (نعیم جاوید) لاہور چیمبر آف کامرس اینڈ انڈسٹری کے نو منتخب صدر علی حسام اصغر نے انتخاب کے بعد مختصر عرصے میں حکومتی اور سیاسی حلقوں میں نمایاں پذیرائی حاصل کرلی۔ وزیراعظم شہبازشریف نے آج ٹیلی فون کرکے علی حسام اصغر کو لاہور چیمبر کا صدر منتخب ہونے پر مبارکباد دی۔ اس سے قبل 2 اکتوبر کو سابق میئر لاہور خواجہ احمد حسان لاہور چیمبر پہنچے اور علی حسام اصغر سے ملاقات کرکے انہیں صدر منتخب ہونے پر مبارکباد دی۔ ملاقات میں صنعت و تجارت کے فروغ اور حکومت و کاروباری برادری کے درمیان تعاون کے حوالے سے بھی تبادلہ خیال ہوا۔ اسی دوران وفاقی وزیر داخلہ محسن نقوی کی جانب سے بھی علی حسام اصغر کو صدر لاہور چیمبر منتخب ہونے پر مبارکباد دی گئی۔ محسن نقوی اس وقت وفاقی وزیر داخلہ ہیں جبکہ پنجاب کی وزیراعلیٰ مریم نواز شریف ہیں۔ 4 اکتوبر کو وفاقی وزیر اطلاعات و نشریات عطا اللہ تارڑ خود علی حسام اصغر کی رہائشگاہ پر پہنچے اور انہیں لاہور چیمبر کا صدر منتخب ہونے پر مبارکباد دی۔ ملاقات میں ملکی معاشی صورتحال، معاشی بحالی، صنعت و تجارت کے فروغ، برآمدات، سرمایہ کاری اور روزگار کے مواقع سمیت مختلف امور پر تبادلہ خیال کیا گیا۔ عطا اللہ تارڑ نے حکومت اور کاروباری برادری کے درمیان مضبوط تعاون کی ضرورت پر زور دیا۔ تاجر حلقوں کے مطابق لاہور چیمبر کی نئی قیادت کیلئے انتخاب کے فوراً بعد اعلیٰ حکومتی شخصیات کی جانب سے مبارکباد اور ملاقاتیں اہم پیشرفت ہیں۔ علی حسام اصغر نے انتخابی مہم کے دوران ”تجارت کا فروغ اور تاجر کی عزت“ کو اپنا بنیادی نعرہ بنایا تھا۔ اب کاروباری برادری کی نظریں نئی قیادت کی جانب سے ٹیکس اصلاحات، کاروباری لاگت میں کمی، توانائی کے نرخوں، چھوٹے اور درمیانے کاروباروں کی سہولت، سرمایہ کاری اور برآمدات کے فروغ کیلئے عملی اقدامات پر مرکوز ہیں۔ واضح رہے کہ علی حسام اصغر نے یکم اکتوبر سے لاہور چیمبر کی صدارت سنبھالی ہے اور نئی قیادت نے حکومت اور کاروباری برادری کے درمیان مسلسل مشاورت کے ذریعے صنعت و تجارت کے مسائل حل کرنے کے عزم کا اظہار کیا ہے۔
علی حسام اصغر کی حکومتی حلقوں میں پذیرائی، 5 روز میں اہم شخصیات کی مبارکباد
